إذا أجا عبالك شي يوم تكتب نقد لاذع بحق نفسك على صفحتك بالفيسبوك، فمع قانون الجرائم الإلكترونية الجديد لازم تتروى وما تتهور.
فمثلاً أنا كثير مرات بأنبني ضميري بعد ما أكون كذبت كذبة زورت فيها نتيجة مقدرة، أو وقعت بغيبة شخص ما وما خليت ولا بقيت عليه، أو غصبت حق مش إلي..
فلو صحي ضميري وكتبت عن حالي إني كذاب ومغتاب وغصاب، فالقانون أعطى المدعي العام صلاحية استدعائي وإدانتي والحكم علي، ولا يشترط أن أتقدم بالشكوى على نفسي، وقد أواجه السجن والغرامة المالية الكبيرة بتهمة الذم والتشهير والقدح اللي ارتكبتهن بحق نفسي.
طب معلش، بصير هيك يا قانون؟ يعني شو نالك من فوتتي على السجن بدون ما حدا يشتكي علي؟ إذا المتضرر -اللي هو بالأساس أنا- ما فتح ثمه ولا اشتكى علي، انت يا قانون شو اللي عاص على نيعك؟!
بعدين ما خطر عبالك إني يمكن أعمل خاطر لحالي وأسامحني؟ طب كيف بتوخذ رزمة آلافات غرامة مني لخزينة الدولة، مش الأصل تنطيني اياهن كوني أنا المتضرر من التشهير والذم وصاحب حق؟! يعني شلون هيك؟!
صبٰاحكم سعيد ومسٰاؤكم سرور 🥀🌹