قرأت منشور على صفحة عامة بالفيسبوك يقول فيه صاحبه: يخوان في معي اغراض لناس ضروري أبعث لهم اياهم، اذا حدا طايح عأميركا هاليومين يخبرني.
عزيزي صاحب الطلب، هل تعلم أن أميركا قارة؟ يعني القارة أكبر شوي من الحارة اللي احنا ساكنينها. عزيزي القارئ والمشاهد والمستمع، هل تعلم أن المسافة بين الساحل الشرقي والغربي هناك 4000 كيلوغرام قصدي كيلومتر؟ يعني تقريبا قد نص شارع الجاردنز من إشارة السيرك لحد السيفوي! يعني ما بكفي تقول يخوان مين نازل عأميركا، حدد أكثر شوي، مثلاً قول يخوان مين ساكن قريب من دوار الطيارة بلوس أنجلوس أو جنب دار أبو جورج بتكساس؟ أو في حدا رح يمر من عند دكانة أبو سميث بفلوريدا؟ هونها شوي عاللي بدك تنتع معه غراظك، اللي هن شوية ملوخية وزرين جميد وعكوب ومرطبان مخلل وعلاك مصدي.
ذات مرة أرسلت إحداهن معي طبخة منسف لبيت أخيها من مدينة لأخرى. شرد ذهني أثناء السواقة، ونسيت أن حمولة إحدى الطنجرتين خطرة -لبن جميد-، لكنني اكتشف تلك الحقيقة المؤلمة بعدما ضغطت الكوابح بشكل فجائي. لو أنني ارتكبت حادث سير لكان أقل ضرراً مما يمكن لكم تخيله، ولو كانت الحمولة يومها مخدرات وتم ضبطها لكان أهون مما وقع. ظلت السيارة سنتين ريحتها منسف.
صبٰاحكم سعيد ومسٰاؤكم سرور 🥀🌹