معلش، طولوا روحكو علي دقيقة، واستحضروا الفكرة: علماء الجيولوجيا بقولوا انه عمر الأرظ 4543 مليون سنة، تقول حاظرين النزالة، ما علينا. فرظاً فرظاً انه هالحكي صحيح، معناته الأرظ انسكنت من هذيك الأيام، لانه يفترظ انه الواحد يسكن الدار مباشرة بعد ما تتعمر. هساعياتي، خلينا نقول انه متوسط عمر البنيآدم سبعين سنة، هاظ قبل ما يبلش يزاقي، فتخيل يا معلم شو يعني 70 بالمقارنة مع 4543,000,000 يعني حياة الواحد بكل ما فيها من تفاصيل يا دوب تطلع بالآخر رمشة على خط الزمن! بالأفراح، بالمفاجآت، بالشغل ومباطحة المستحيل، بالراحة، بالحب، بهداوة البال، بالانتصارات، كله كله هاظ يا دوب يطلع رمشة، شايف علي كيف شلون؟
نيجي للزبدة،، من لومن فتحنا عيوننا بهالدنيا واحنا حيالله بنسمع عن الحضارة والانجازات، بينما ما شفنا على أرظ الواقع إلا نكبة أو هزيمة أو نكسة أو وكسة أو أزمة أو منعطف أو جائحة! ول على هيك حظ! يعني ما اجا يطلع دور رمشتنا على خط الزمن إلا بهيك بهادل وقلة هيبة؟
حقبتنا هاي مش رمشة؛ هاي بلا مؤاخذة فسوة.
صبٰاحكم سعيد ومسٰاؤكم سرور 🥀🌹